1Cor 1 | MCQ | STEP | Na Poru Godi oni ura ijino Jesu Keriso oni apasorua re'urono iji pijihajara Sositanisi ka'ene núni vweiji'i veju.

1 Corinthians 1

Vu'a Anejijihina

1 Na Poru Godi oni ura ijino Jesu Keriso oni apasorua re'urono iji pijihajara Sositanisi ka'ene núni vweiji'i veju. 2 Godi oni sosia ka'ene Korinitia namuna 'ee ea maho'o ka'ene Jesu Keriso oni vaji iji pijihume ani'ina ariramaa'e rejara 'ee ea ka'ene iji pijihume akuavi'ina'e rejara 'ee ea 'aho'a ka'ene kwaa ichihichi núni Natohwa Jesu Keriso oni ihi 'urahi'i oja mahura ka'ene núni Natohwa 'ee puni Natohwijihi puna'e veju. 3 Maiji vwihanii'ina 'ee matauvi'ina ka'ene Godi núni Omiji'o Jesu Kerisona'i rena roajija vajihama.

Keriso Oni Vaji Merajúhe 'Ee Ahuma Hihuna 'Waramajina

4 Godoni maiji vwihanii'ina ka'ene Jesu Keriso oni vaji ja mihajihuna'e na na'ia mapoka nuni Godijaho jonijihuna'e teimani 'wavura. 5 'Ene Huni vaji uneunecha 'ee ira 'warahuna 'ee henaka maho'o venaume niareri rena paranana. 6 Vu'a ka'ene Keriso rone 'waravajaho niroe joni vaji tusame nimaa'e rena namu. 7 'Enajihuna'e núni Natohwa Jesu Kerisora rohuni veiji 'ajahuri vajakaho Godoni swara papivusahuna. 8 Hura ja 'u'o 'uninamie kisina'e rena va'e vea túchamai 'e'une 'ee núni Natohwa Jesu Keriso oni veijaho panamúhuna. 9 Godiho pauchavi'ini jihuna'e Huni Hariha ka'ene núni Natohwa Jesu Keriso ipu'úmo ahuma hi'avarono ja Huni vaji iji pijihana.

Sosi Vaji Ahaaravujina

10 Vwehu nune na iviamaa núni Natohwa Jesu Keriso oni iha vaji 'waravukúne veje joni vaja panakarame 'ee paahaame hiha kaivo vwiha kwinu vwihane 'ee ura nikwino rene hiha. 11 Vwehu nune Karoi oni ehipo na 'warivu'e hejujaho joni vaja hine ninakarame 'ura'aravu 'wivu. 12 'Ejume na iviamaa raka ka'ene rona 'waravujaho ikena. Ja ea kwinu kwino na Poru 'ararihau 'iavu'e 'ee vu ea pina na Aporasi 'ararihau 'iavu'e 'ee vu ea pina ija 'iamo Na Sipasi 'ararihau 'iavu'e vu ea pina ijá 'iamo Na Keriso 'ararihau 'iamu. 13 'Ú Kerisoho apene 'ahaasavare? 'Ú Porura jonijihuna'e korosia 'ahi kwamane? 'Ene 'ú ja Poru oni iha 'ahi toi samahare? 14 Na Godi teimani 'wavujaho na ja ea 'aho'a toa pasamahuta kaivo na ea Kurisipasi'o Keasi'o toi samauta. 15 'Enajihuna'e ja ea pina areri ija'ina pa'wahuna. Ja nuni iha 'ahi toi samahara pa'iahuna. 16 Na nimaa'e Sitepanasi oni kachi'ina 'u'o toi samauta kaivo vu na ea 'aho'a'e toi samahuna na puruva retiu. 17 Ijihuni maijaho Kerisoho na ea toi sama'urono ranamihuna pana kaivo vu'a maa maiu'ina'e naja'urono ranamiana. 'Enakaivo na emaapuni vwiha ijino 'wara'ipisa Keriso oni korosijihuni vu'ijaho maa pa'ana'e reja'a.

Keriso Ka'ene Godoni Harure 'Ee Vwiha Mamaa Ijina

18 Ea ka'ene panimaa roji'ini jihipuni una'ijaho korosi ijihuni vu'iji hejujaho ira'ata'e reju. 'Enakaivo nú ea ka'ene nimaa roji'inijipo hejujaho ijaho Godoni harurijina. 19 'Enajihuna'e Godoni ira vaji ika'ina vejara.

Nara ea ka'ene vwiha mamaijihi puni vwiha ijija ruarahe pa'arehuna. 'Ene ea ka'ene hena kama paraji'ini jihipuni henaka ijija 'eka karaa rori 'aninamihuna 'wamana.
20 'Ene ea ka'ene vwiha mamaijija ichihune? 'Ene Sikuraipia ichihune? 'Ene ea ka'ene mwe'a kehuni vwiha rukina ka'ene ninakaravi'inijija ichihune? Godira mwe'a kehuni vwiha mamaijija 'eka venaume vwiha pa'ana'e rejara. 21 Mwe'a kehuni vwiha mamaa vajijaho paroe Godi hena kahunijaho nikimana. Godi teamamajaho ike vu'a ka'ene ea 'ahopo kavume maa pa'ana'e renuna vajakino najahume ea ka'ene nimaa rojajija maraniana. 22 'Enakaivo Jua uneunecha ka'ene ea areri pavejuji jarirame 'waravura. 'Eju'e Kuriki vwiha mamaijihi saravura. 23 'Enakaivo núra najahujaho Kerisora korosia 'ahi kwamaji najahe 'waravura. 'Enakaivo ike vu'akaho Jua puna'ijaho ijara venau'e amaaresume arihujina. 'Enakaivo Jenitaru puna'ijaho ike vu'akaho maa pa'ana. 24 'Ene Jua 'ee Kuriki ka'ene 'umenajija Kerisoho Godoni harura 'ee Godoni vwiha mamaa aririjina. 25 Ijihuni hahi emaapo vwihaju'e Godi vwiha mamaa pana rojujara emaapuni vwiha mamaijija asita paranana. 'Ene emaapo vwihaju'e Godi harura pa'ana rojujara emaapuni harura asita paranana. 26 Ijihuna'e vwehu nune ja 'umenajija hami vwiha'avara. Joni vaja ea mapoka vwiha mamaa vwihaji'ina ka'ene haha ikehunijija ija papijihana. 'Ene ea mapoka harura rukina ija papijihana. 'Ene kinia 'ee kwinia mapoka ija papijihana. 27 'Enakaivo Godira uneunecha maa pa'ana ka'ene iki mwe'i navujino 'eke veje ea ka'ene vwiha mama'ina rukinijihi juna'avarono iji pijihana. 'Ene Godira uneunecha ajuasina ka'ene iki mwe'i navujino 'eke harusinijihi juna'avarono iji pijihana. 28 Hu mwe'akino uneunecha ka'ene emaapo túa vetie 'ee senavujija iji pijihana. Godira ijí 'eke mwe'a iki emaapo kime mama'ina rojujihi túa veti'i 'ahaume iji pijihana. 29 'Ejakame ea pina Godoni una'a pakehi kehi ve'amarono iji pijihana. 30 'Enakaivo Hura venaume ja Jesu Keriso oni ea'e rejara. 'Ene Hura núni vwiha mamaa ka'ene Godoni rena roajaho rene 'ee núni ariramaijaho rene 'ee núa'e 'imenúa 'eki'ina'e renana. 31 Nitama Godoni ira vaji ika'ina vejara. Ea irara kehi kehi o'iro 'aha'amajaho Natohwi jihuni vaji kehi kehi o'amana.